Colloquia Latina Barcinonensia VII

Sicut nuper nuntiavimus a Kal. Iul. usque ad prid. Idus Iulias per rete habenda sunt Colloquia Latina Barcinonensia, editione hoc anno iam VII. Diu in pagina circuli pipiatoria nuntiolum affictum inveniri potuisti. Duplex petitio iam nunc adhibetur:

   a) Ad scholas comparandas precamur ut quaestiones praevias nonnullas discipuli respondeant.

   b) Ceterum,  necesse est ut  discipuli nomen dent hoc in ligamine ad pecuniam solvendam tuto ab ICE disposito. Haec altera est conditio sine qua ut cursum sequi et certificationem habere possint.

Sicut anno praeterito consilium adhibemus ut adeatis paginam pipiatoriam @circulusbcn, praecipue sub titulis #ColloquiaLatinaBarcinonensia et #CLB ubi novae res de hac editione repperiri possint. Gratias agimus denuo Instituto Sciencitarum Educationis (ICE) ex Universitatis Studiorum quae Autònoma de Barcelona vocatur (UAB), qui Colloquia Latina Barcinonensia post plures annos fide semper solida faveant.

*

Qualis erit cursus: Scholae tales sunt quibus adesse oportet cum per rete aguntur: magistri modo webinarii coram discipulis loquuntur (cumprimis ab hora quinta vespertina), pelliculas, imagines, pagellas selectas, et alia ad hoc paratas struent ornatas cum plurimis et variis exercitiis.

Quibus est destinatus: Magistris Latinitatis in lyceis laborantibus aliisque hominibus, qui aliquatenus Latinitate eruditi velint expeditius Latine loqui et legere et scribere. Exercitia, textus et alia multa quae in cursu afferentur aptae erunt quidem ad linguam latinam docendam.

Quot horas complectitur: 30 horas

Quando fiet cursus: a die 1º mensis Iulii usque ad diem 14um eiusdem mensis. Singulis diebus tempus discipulorum ut laborem exerceant erit plus minusve tres horae (attamen nemo cogetur ut totum per tempus in pagina retiali maneat, nam libertas quaedam laboratum dabitur).

Vbi fiet: In sede electronica quam ad hoc praebebit ICE.

Moderatrix: Cándida Ferrero Hernández, Seminarii Scientiarum Antiquitatis et Medii Aevi Universitatis Autonomae Barcinonensis.

Magistri:  Irene Regini (Satura Lanx), Rodrigo Portela, Jaume Ripoll, Raül Segarra, Ramon Torné.

Quanti constat: 115 € (quam pecuniam in hac tuta pagina solvere debent discipuli)

Commendatio: Sunt qui putent linguam Latinam tantummodo interpretando doceri posse. Nos vero eas adhibere rationes proponimus ut Latinitatem doceamus quae passim usurpantur in linguis hodiernis docendis.

Cursum igitur offerimus, ubi Latine perpetuo docetur atque participes provocabuntur ut hoc utantur sermone loquendo atque scribendo, et de semetipsis et de scriptis Latinis omnium aetatum. Ceterum dabimus quidem operam magistri ut tirones omnia intellegant simulque ne peritiores taedio afficiantur.

Hac de causa constituimus participibus talia proponere exercitia ut et Latinitatem exerceant et scripta Latina proposita “intus et in cute” intellegant et valeant postea in scholis suis nonnulla adhibere ex iis quae in cursu nostro didicerint.

Quonam modo id fiet sive modus operandi: Scholas trademus ea methodo utentes, quae vulgo communicativa dicitur: primo provocabimus participes ut sermones serant de scriptis Latinis imaginum ope quae ad ea attineant. Deinde scripta ipsa excutiemus. Animum praesertim intendemus in verba et formulas utiliores. Postea exercitia varia proponemus ubi participes expeditius atque fusius suas sententias proferre valeant.

De vita circuli a mense Martio

Quamquam paene totus terrarum orbis per duos menses clausus mansit propter virus coronarium eiusque angorem, sodales latinitatem et scholas graecolatinas colentes multifarie  —attamen praecipue per rete et nullo otio fruentes laborarunt.

Exemplo erit imprimis nova sedes retialis a Samuel González confecta, Latinonline.es ad linguam latinam docendam ordinata. Huic addas paginam a diurnario Francesco Lepore latine conscriptam. Accedunt etiam oratiunculae hic et illic ex usu exoneratum dispositae, vel ibidem exaudiendae. Has apud circulum barcinonensem suadent sodales: In foro RomanoLitterae christianae, Musa pedestris, Salvi sitisSatura lanx, Sermones raedarii.... sed alia multa reliquimus. Valde prodest etiam pagina Latin confiné, unde possis dialogos depromere, necnon Musaeolum, Vivarium novum, etc.

Exercitia varia ac expedita frequenter excogitaverunt et, ex iis quae in mentem veniunt, nunc enumerari liceat: pellicula ad poema "Sub vesperum" destinata quod Josep Carner (princeps poetarum apud Catalanos) composuit; exercitia varia ad diem festum Sant Jordi paravit amicus Robertus et Kahoot de rebus mythologiae proposuit Montse (ubi LXXX participes adfuerunt!); in nugis pervariis etiam versati sunt sodales, v. gr. videas sis textum hunc de camelis.

Quoad libros nuper editos, eccam nuntios novos: Montse Bastons in luce prodidit librum poematum, Fantasiant, qui multis cordi est (e.gr. Cristinae) ubi amores coniungit sali et ad antiquos non pauca in pagellis suis refert. Interim sodalis Helias Jiménez Possellii Colloquia de integro in lucem proferre parat; et iam liber a Beniamino D'Ooge compositum, c.t. Triginta colloquia latina apud Amazon venditur.

Ad menses aestivos parandos non defficiunt quoque cursus —quamquam, proh dolor, hoc anno Caelum Matritensis et Scholae Latinae Romanae non celebrabuntur. Attamen amici circuli quorundam notitiam praebuerunt: Cursus virtualis gratis apud Archivium Urgellensem, Officinae litterariae ubi Gabriel Cereceda de translatione e latino sermone docebit; adsunt etiam De re didactica latinae linguae,  Schola aestiva Posnaniensis, et Accademia Vivarium Novum qui cursus per rete habebuntur.

Item per rete habenda sunt Colloquia Latina Barcinonensia, editione hoc anno iam VII, sicut in pagina circuli pipiatoria nuntiatum est. Ad scholas comparandas precamur ut quaestiones praevias nonnullas discipuli respondeant. Gratias agimus igitur Instituto Sciencitarum Educationis (ICE) ex Universitatis Studiorum quae Autònoma de Barcelona vocatur (UAB), qui Colloquia Latina Barcinonensia post plures annos fide semper solida faveant. Plura de hoc cursu tamen vobis spectanda sunt in hac sede retiali.

Restat demum ut brevem memoriam faciamus de cursu anno praetererito habito, quod magno cum gaudio accepimus verba quae Daniel Pettersson munere Stocolmia ad participes illius cursus misit. Is aequo animo caeli aestus morem ferens, adeo utilia consilia impertitur ut eum sicut verum magistrum omnes habeamus.

Duae sessiones anni MMXX (mensium Ianuarii et Februarii)

Post ferias Natalicias sessione Ianuario mensi habita in circulo fabulam de pavone et testudine quam paraverat satura lanx legimus. Postea, alii dolos Aeneae et Didonis furorem apud Romam aet. (p. 73-76) lectitaverunt dum alios consulte et erudite edocuit Robertus de rebus militaribus saec. IV pCn. (quod documentum invenies apud  https://ja.cat/vegetius)




In conventiculo mensis Februarii fabulam Petronianam de versipelle a Paco Carbajo ad usum discipulorum dispositam studuimus et quaestiones solvimus. Certo quidem luculenta eius oratio consodalibus omnibus arrisit, potissimum etiam brevis expositio quam feliciter monstravit de titulis et inscriptis quibusdam ad hoc utilissimis.


Pergitur dein epistola pliniana et Sermonibus Orbergii Romanis, quos textus Albertus Georgius Maia Raimundus recitaverunt et paululum explanaverunt.

Lustratio Barcinonensis et sessio postrema anni MMXIX

Habita est lustratio ut indictum erat magna cum caterva amicorum qui Barcinone Tarracone Ilerda necnon e variis civitatibus et oppidis venerunt. Ducem habuimus Henricum Hernández qui distincte et magna cum eruditione gregem totam docuit de aquaeductis necnon de muris antiquae coloniae Faventiae Barcinonensis: imprimis arcus quos omnes mirabantur in platea Nova ut falsos putare debemus, verumtamen vestigia ante Bibliothecam Balmesianam sicut alia in domo Ardiacae sita et monstravit et pulchre explanavit nam ante omnia aquaeductus exstructus fuerat. De muris saec. I et iis qui saec. III instructi fuerant novissima exempla patefecit quibus inopinantes gratissime icti fuere.

Prandium satis superque cepimus in popina c. n. Vasconia (Carrer d'en Gignàs, 13) ubi bene epulati solanas cum alsiamentis, mixtiones varias, tauri caudam, salamentaria fricta, panem amatorio pomo, cerevisiam et vinum una cum cachinnis multis, iucunde horam et dimidiam cuncti egimus.

Postea sessio consueta habita est apud pati Llimona: legimus Plinianam epistulam (hic Word et hic PDF penes lectorem) commentariis variis ornatam in qua et amico suo et simul nobis otium necnon studium suadet. Post inercapedinem iam in parte altera, Albertus, magister optimus, alios docuit monstrans paginas libri c. t. Piper Salve necnon cantus hodiernos latine redditos (quos hic ad depromendum posuimus) dum ceteri Romam aeternam recitabant usque ad p. 73,69.

Dum Ferias Natalicias exspectamus, photographematibus fruimini, o amici!
lustratio 19 by deltois on Scribd

Praeco ad conventiculum pridie Kal. Decembres a. MMXIX

Proximum conventiculum pridie Kal. Decembres duplex habebitur: mane, hora duodecima lustratio Barcinonis antiquae vulgabitur duce Henricus Hernández March, Mousaei Historiae Barcinonensis, una cum sodalibus Tarraconensibus. Lustratio incipiet in Plateia Nova, ante portam Romanam.

Post prandium in caupona cui nomen Bidasoa (sita in Carrer d'en Serra, 21), apud Pati Llimona, hora quarta postmeridiana et quadrante, manus operi assueto in circulo adiciemus (per greges Pugionem et Romam aeternam legemus). Venite frequentes, sine ullo dubio exercentes et discentes valde amicita fruemur.

En programma huius diei quod Araceli et Eulàlia paravere:


(Nolite oblivisci: nullum conventiculum proximo mensi Decembri agetur, itaque anno MMXX, Sabbatho die 11º Ianuarii una apud Pati Llimona denuo consedemus ad novam sessionem habendam.)

Quae facta sint in novissimis conventiculis

Duobus sessionibus celebratis huius cursus, breve compendium hic fiet de rebus, libris novisque sodalibus qui Circulum Latinum nuper iunxerunt, quorum memoriam facere libet: Diana, Georgius, Maia, Nuria, Paco. Sponte sua in mentem subeunt verba illa quae apud Romae aet. leguntur (cf. p. 65) nam «sicut Tyrii frequentes conveniunt et in toris pictis iubentur discumbere».

Cum conveneramus fabulas varias necnon singula capitula Pugionis ac Romae aeternae (Cupido Ascanii faciem mutavit ut Didonis amorem incenderet etc.) per greges et recitaverunt sodales et disputationes variae ortae sunt. Magno adiumento fuerunt labores et exercitia quae Carme Barril et Carme Fonollet paravere ut grex tironum progressus et caperet et exhiberet. Ambabus gratias maximas agimus!


Paginas retiales novitate vel magni pondere commendaverunt duolingo.com ac biblissima.fr Marisa, saturalanx.eu Iolanda, mauriziopistone.it ac alatin.it Alexander Calabriensis (cui gratulamur cum mensi septembri dignitatem doctoris apud Universitatem Barcinonensem accepit). Grates etiam afferre decet Conceptioni cum latine cantus iucundissime aptavit: en ligamen ubi documenta servantur.

Primae sessionis huius cursus praeconium: die 5º mensis Octobris

Initium ut adgrediamur hoc anno, nuntium facere oportebat nam ii in circulo magistri qui agnitionem a Dept. Ensenyament habere cupiant ut grex laboris (aliter, grup de treball) LX horas complectens participibus adhibeatur mensi Iunio nomen dare necesse est IN HAC PAGINA. Ibi invenire debetis locum ubi 4060491406 "Circulus latinus barcinonensis" adhibeatur.

Ad ceteras res parandas quae ad auctores, exercitia, aequas hominum libras attinent inscriptionem in hac provisionali pagina domestica ut faciatis ab omnibus postulamus.

Ut iam diximus conventicula mensis Octobris erunt diebus Sabbati 5º et 26º hora postmeridiana 16:15 in loco annis praeteritis solito, Pati Llimona.

Instrumentum laboris his primis diebus liber a Daniel Pettersson et Amelie Rosengren, Pugio Bruti, adiumento erit. Postea, magni pretii erit liber Roma aeterna, a clarissimo Ørberg conscriptus. Aliae res quae per greges duci possunt chartae ipsae in conventiculo ipso tradentur.

Exspectamus vos, venite frequentes!